Føroyar og Grønland samd um býti av fiskirættindum fyri 2026

Føroyar og Grønland hava 3. desember gjørt avtalu um sínámillum fiskiveiðirættindi fyri 2026.

Samráðingarnar vóru hildnar í Nuuk.

Avtalan inniber smærri lækkingar í kvotunum á báðum síðum.

Føroyar lata Grønlandi svartkjaft og norðhavssild at fiska í føroyskum sjógvi, har svartkjafturin er bulurin í avtaluni. Sambært vísindaliga tilmælinum lækkar heildarkvotan av svartkjafti við 41% í 2026. Hetta ávirkaði samráðingarnar, sum eisini bóru brá av, at Grønland ynskti ikki at økja um kvotuna av norðhavssild í føroyskum sjógvi, sum sambært vísindaliga tilmælinum hækkar við 33% í 2026.

Úrslitið gjørdist, at grønlendska kvotan av norðhavssild stendur í stað við 4.900 tonsum, ímeðan grønlendska svartkjaftakvotan í føroyskum sjógvi lækkar við 3.350 tonsum. Harumframt lækkar atgongdin hjá grønlendskum skipum at fiska svartkjaftakvotuna, sum Grønland hevur í NEAFC- økinum, í føroyskum sjógvi við 3.217 tonsum.

Tillagingar vóru eisini í kvotunum hjá føroyskum skipum í grønlendskum sjógvi. Brosmukvotan, sum hevur verið misjavnt gagnnýtt seinastu árini, lækkar við 200 tonsum. Føroyska toskakvotan og svartkalvakvotan í Eysturgrønlandi lækka við ávikavist 150 og 50 tonsum, meðan hjáveiðikvotan av kalva lækkar við 25 tonsum.

Úrslitið av samráðingunum er sostatt, at føroysk skip í 2026 kunnu fiska tilsamans 2.350 tons av toski í grønlendskum sjógvi við 25 tonsum av kalva sum hjáveiðu, meðan brosmukvotan verður 175 tons. Føroysku kvoturnar av svartkalva í grønlendskum sjógvi verða 275 tons í Eysturgrønlandi og 100 tons í Vesturgrønlandi.

Grønlendsku kvoturnar í føroyskum sjógvi í 2026 verða 4.900 tons av norðhavssild og 20.400 tons av svartkjafti. Eisini fær Grønland atgongd til føroyskan sjógv at fiska grønlendsku svartkjaftakvotuna í altjóða sjógvi í NEAFC-økinum, sum er 4.597 tons.

Arbeitt hevur verið við at dagføra rammuavtaluna um fiskiveiði millum Føroyar og Grønland, og er hetta arbeiðið nú við at vera komið á mál. Londini eru samd um at miða ímóti at undirrita nýggju rammuavtaluna í Føroyum á vári 2026.